La taliyaha Amniga qaranka Ee Madaxweynaha ayaa ka hadlay qorshaha dagaalka As ee dowladda.
Dowladda Soomaaliya ayaa faahfaahin ka bixisay guulaha laga gaaray howlgallada dalka ka socda iyo qorshaha sii socoshada howlgallada ka dhanka ah Al-Shabaab.
La taliyaha Amniga Qaranka Xuseen Macalin ayaa sheegay in dagaallada ka dhanka ah Al-Shabaab guulo waaweyn laga gaaray, isla markaana laga xorreeyay meelo badan ay gacanta ku hayeen hase ahaatee aysan weli fari ka qodneyn.
Wuxuu sheegay in howlgallada sidoo kale khasaaro xoogan lagu gaarsiiyay Al-Shabaab, isaga oo balan qaaday inay sii socon doonaan howlgallada ayna qorsheysan yihiin ilaa guud ahaan dalka laga saaro Al-Shabaab.
Inkastoo hakad uu kuyimid howlgalladii ka dhanka ahaa as ee dalka ka socday hadana hadalka La taliyaha Amniga Qaranka ee Madaxweynaha Soomaaliya Xuseen Macalin ayaa kusoo aadaya xilli weli meelo badan oo dalka ah ay maamulaan Al-Shabaab isla markaana mararka qaar ay weeraro qorsheysan ay ku soo qaadaan Saldhigyada Ciidamada dowladda Soomaaliya.
